A birnin Diffa na jamhuriyar Nijar, gangamin « Komawa Yara Makaranta Lafiya » na da nufin karfafa gwiwar dukkan yaran yankin da su koma makaranta, hatta wadanda suka daina karatu ko kuma ba su samu damar zuwa can ba.
Yankin Diffa da ke kudu maso gabashin Nijar, kusa da Najeriya na fuskantar matsaloli musamman ta fuskar ilimi da tsaro. Gwamnan Diffa ya bayyana cewa makaranta na da matukar muhimmanci, ba wai don koyo kadai ba, har ma da kare yara. Ya ce: « Ci gaban kasarmu ya dogara da ilimi. »
Manufar kamfen dai ita ce baiwa dukkan yara, hatta wadanda suka daina zuwa makaranta, ko kuma wadanda ba su taba zuwa ba, su koma karatu su samu makoma mai kyau. Gwamnan ya jaddada mahimmancin taimako daga malamai da iyaye domin a dawo da dukkan yaran aji.
Wannan kamfen dai yana samun goyon bayan gwamnatin Nijar ne, wadda ta sanya ilimi a gaba, tare da taimakon kungiyoyi masu zaman kansu da na Majalisar Dinkin Duniya. Ta hanyar wannan aikin, Diffa na fatan bayar da kyakkyawar makoma ga matasa a yankin ta hanyar ba da tabbacin samun damar zuwa makaranta.
